Улаан цутгаланд “Kharakhorum ice festival -2024” тэмцээн болж, олон улсын тамирчид оролцлоо
Өвлийн адал явдалт аялал сонирхогчдын хүсэн хүлээдэг “Kharakhorum ice festival -2024” мөсөнд авиралтын тэмцээн 12 дахь жилдээ боллоо.
Мэргэжлийн тамирчдын цомын аварга болон сонирхогчдын хурдны төрлийн авиралтын шилдгүүд шалгаруулах тус тэмцээнд мэргэжлийн болон сонирхогч 50 гаруй хүн оролцсоны дотор АНУ, Франц, БНХАУ-ын тамирчид байв. Мөн UIAA холбооны мөсөнд авиралтын олон улсын шүүгч Yu Kai Yi шүүгчээр ажиллахын зэрэгцээ цаашид тив, дэлхийн чанартай тэмцээн болгохын тулд юуг анхаарах талаар зөвлөгөө өгч, санал солилцсон юм.
Энэ нь “Kharakhorum ice festival-2024” тэмцээний цар хүрээг илэрхийлж, Олон улсын чанартай фестиваль болох эхлэлийг тавьж байгааг зохион байгуулагчид ярилаа.
Тэмцээний эмэгтэй цомын эзнээр “Сутайн бор” клубийн тамирчин Н.Сэлэнгэ, эрэгтэй цомын эзнээр Улаанбаатар аялагч клубын тамирчин Ч.Мандахбаяр нар шалгарсан бол сонирхогчдын хурдны төрөлд эрэгтэйчүүдээс Б.Бямбадорж, эмэгтэйчүүдээс н.Чимэддулам нар тэргүүллээ. Мөн фестивалийн үеэр сонирхогчдын богино зайн бартаат замын уралдаан, багийн мөсөн шагай харваа, мөсөн сурын харваа зэрэг тэмцээн зохиож, Архангай, Булган, Дундговь аймаг, Улаанбаатар хотоос баг тамирчид оролцлоо.